Kaheen sehra kaheen sookhay shajar achey nahi lagtay
Mujhay ab khwabzaaron ke safar achay nahi lagtay

Jawabi khat main Us ne mere barey main ye likha tha
Bura bhi keh nahi saktay magar achay bhi nahi lagtay

Nahi masroof main itna ke ghar ka raasta bhooloon
Koi jab muntazir na ho to ghar achay nahi lagtay

Samandar tairti laashon se ye kehta raha shab bhar
Mujhay bhi doobnay walo, bhanwar achay nahi lagtay

Nahi aisa ke ab parwaz ki taaqat nahi baqi
Meri ummeed ke pannchi ko par achay nahi lagtay

Main bhi kitni pagal hoon na
Sang hawa k urna chahoon
Titli ban kar nagri nagri
Gulshan Gulshan phirna chahoon
Phooloon k sab rang chura kar
Chunri apni rangna chahoon
Main bhi kitni pagal hoon na!

Chandni shab ko khunak hawa main
Chand nagar ko jana chahoon
Amber k ik ik taarey ko
Daman main bhar lena chahoon
Bhaag k sarey nanhey jugno
Muthi main band karna chahoon
Main bhi kitni pagal hoon na!

Kabhi kabhi un nazroon k main
Gongey sapney parhna chahoon
Uss ki sochoon k zeney per
Nangey pa’oon main charhna chahoon
Janti hoon na-mumkin hay ye
Phir bhi kitni pagal hoon main
Janey kya kya karna chahoon
Titli, khushbo, badal ban ker
sang hawa k urna chahoon

Main Bhi Kitni Pagal Hoon Na!